El Cuélebre de Corao (Asturias).

Cueva´l Cuélebre, La (~ La Cueva ~de Frasinelli): Cueva con tarrén arrimao que ta xunto a un peñascal arboláu. Ta penriba de la ería San Nicolás. Llenda al norte col pueblu de Coraín. Llámen-y también La Cueva de Frasinelli. Esti alemán fízose cola posesión délla y col tarrén que la arrodia nel sieglu pasáu. Fizo terraces nel tarrén pa llantar frutales onde xorrecíen perbién. Él mesu escavó na cueva y alcontró delles ferramientes de cobre y un ídolu de piedra de la Edá del Bronce, de lo que falen dellos llibros d´hestoria. Cunta una informante la lleenda que la xente de la parroquia conoz: "Na cueva añeraba un cuélebre al qu´habíen d´echa-y una xata diaria, pa que los dexara trabayar en La Vega Hondos, que ta baxo la cueva. Entós, el cura d´Abamia hartucáu del asuntu, un día, allegóse a la cueva cola cuenta de desanicialu. Y asonsoñando les culiebres echó-y un xiblíu pel huracu la madriguera pa hacelu salir. Namái que llegó´l cuélebre, el cura pegó-y un tiru nel gargüelu y fuxó al trote nel so caballu empobinando p´Abamia. El cuélebre, mancáu, foi tres d´elli. Pero´l caballu estrapallóse-y pola escorribanda, asina que´l cura hebo de vadiar El Güeña a pie, per onde agor ta El Puente Abamia. El cuélebre metióse nel ríu tamién, y entró-y l´agua pel furacu del tiru, afogándose ellí mesmu. Dempués, sacáronlu pal camín Canaloríu, que ta al pie, onde tevo en canal munchu tiempu podreciéndo". Nos cartafueyos d´escritures antigües ta conseñáu, tamién, el nome de "Cueva Cuherreru," y "Guf-ferrero".